Mensahe Para sa Cuaresma, Taon 2011

Sa pagdatong kan banal na panahon nin Cuaresma, an Simbahan giraray hinahalat na manumpungan an saiyang Esposo na si Cristo sa saiyang pagkabuhay-liwat. Sa paghalat asin pag-puka kan bilog na simbahan asin komunidad pinapa-orog an pagpamibi, paggibong karahayan asin pagsolsol, tanganing magin makahulugan an bagong buhay na ipinangako kan Kagurangnan duman sa krus.

Sa katotoohan, an krus iyo an nagtataong kahulugan sa lambang buhay niatong mga Cristiano. Sa mga tataramon kan satong Santo Papa:

“An Misterio kan krus, pinagmawot na makaarog kita sa saiyang kagadanan tanganing magkaigwang tunay na pagbakle sa satong buhay… tanganing maisusog niato an satong buhay sa kabotan nin Mahal na Dios; tanganing magin talingkas kita sa pagigin makasadiri, sa pagpaabaw-abaw sa iba asin tanganing magin bukas kita giraray sa pagkamoot ni Cristo.”

Inaagyat kita kan satong Simbahan na magpanguros bako lang sa paagi kan satuyang mga muro asin kamot, kundi kita man magpanguros sa paagi kan satong buhay. Panindogan niato an kahalagahan kan satong buhay na iyo an dahilan kun tano kinugos ni Cristo an krus, an saiyang kagadanan. An orog kapalad na nganing buhay binendisyonan pa tanganing makisumaro sa pagkabuhay nin Santissima Trinidad. Mayo nin siisay man an pwedeng mag-olang, mag-abuso asin mag-bawi kaining balaog nin buhay na binayaran kan dugo kan satong Kagurangnan.

Panindogan niato an satong ngaran bilang mga parasunod ni Cristo sa paagi kan pag-saro kan satong mga sadiri Saiya. Sa satong pakisumaro sa Saiyang kagadanan, kita man nakikisumaro sa saiyang pagkabuhay-liwat. Sa pag-ako niato kan kasakitan nin huli kan pag-taong saksi niato sa satong pagtubod asin sa katotoohan, an kasakitan bako nang padusa kundi pagheras sa serbisyo kan satong Kagurangnan. Sa paninindugan niato para sa buhay lugod makamtan niato an promesa nin buhay na daing kasagkoran.

Magin banal asin makahulugan lugod an saindong Cuaresma.

+Leonardo Z. Legaspi, O.P., D.D. Arzobispo kan Caceres