Pagkabuhay-Liwat

Katatapos pa sana kan satong pagselebrar kan Todos los Santos asin Pyestang Kalag. An ebanghelyo ngunyan na Domingo pagpasarig kan satong pagtubod sa ika-duwang buhay. Igwa nin langit, purgatory asin impyerno. Ini an tolong 'tourist destinations' kan mga kalag nin tawo. Mahalagang marhay na pagplanuhan an satong paglakbay tanganing makaabot kita sa satong piniling dudumanan.

An karatan dai nawawara. Ang maraot na plano parating napapangyari. Corrupt politicians never die. They don't even fade away. Tano? Nin huli ta igwa sinda nin bisyon, misyon asin obheto sa buhay. Sabi kan madayang surugoon, "masain na ako kun ako palayason sa trabaho? Dai ako tataong magkalot, supog akong makilimos. Ah, aram ko na. Dadayaon ko pa an sakong kagurangnan. Gurano tabi an utang mo? Uyan, isurat mo. Sinkwenta na sana."

Kan nakaaging aldaw, ikinumpara si PNoy ki Obama. Pareho daa mabagsak an saindang administrasyon huli ta dawa sinda igwa nin marhay na intesyon para sa nasyon, dai ninda ini naibubugtak sa marhay na istratehiya. An mga aki nin diklom matitibay digdi. Kaya inomaw kan Kagurangnan. Dapat an mga aki nin liwanag matibay man mag-isip nin istratehiya. Kulang an marhay na intensyon. Kaipuhan pa an pagplano kan mga detalye kun pano mapapangyari an saindang marhay na bisyon.

An mga saduceo siring sa mga pulitko ngunyan na panahon. Sinda an mayayaman. Kapot ninda an ekonomiya kan nasyon. Sinda an nagdidikta kan dalagan kan banwaan.

Mayo sindang pagtubod sa ika-duwang buhay. An saindang pilosopiya: Hakuna matata. An pilosopiya kan orig duman sa The Lion King na sine. Magkakan, mag-inom, mag-ogma. Mang-api ka na sana, dai ka nanggad magpa-api; makasaro ka na sana, dai ka nanggad magpasaro.

Naiiba digdi an pilosopiya kan mga Kristyano. Nagtutubod sinda sa ika-duwang buhay. Asin an buhay na ini mas mahalaga kisa sa presenteng buhay. Minamawot ninda an langit, an kahadean nin Dyos. Ini an saindang pangiturugan. Ini an saindang 'tourist destination' na pinili. Asin bako sana ining 'tourist' kundi final destination. Bako ining bakasyon. Ini sarong homecoming, an pagbalik sa tunay na harong, sa harong kan satong Kaglalang.

Kita mga peregrino. Kita naglalakbay pasiring sa Kahadean nin Dyos. An banwaan ta ngunyan iyo an satong sasakyan. Kun an sasakyan raot, may diperensya, dai iyan makakaantos. Maralayog kaiyan an manibela asin gulong, mapuputulan nin fan belt, ma overheat. Ini dahilan an kun tano ta dapat kitang magmakulog sa banwaan. Ini an dahilan kun tano ta sa pagigin disipulo ni Kristo, kaipuhan man na kita magkaigwa nin adbokasiya. Ano an maitatabang ta sa pagpakarhay kan satong sasakyan?

An media saro sa mga may deperensya sa satong sasakyan, sa satong banwaan. Sya na dapat magin burabod nin katotoohan, nagigin burabod na sana nin tsismis asin intriga. Nin huli ta sula sa kwarta, an bida parati iyo an makwarta. Saro sana ini sa mga dapat nyatong pakarhayon.

Dai kita maglaom sa mga saduceo. Mayo sindang pagtubod sa ika-duwang buhay. Dai kita maglaom sa mga kuraptong pulitiko. Mayo sindang planong mapakarhay an satong sasakyan, an satong banwaan. An katungdan na ini yaon sa satong mga kamot, kita na naglalaom kan ika-duwang buhay, kita na inaapod mga Aki nin Liwanag.