Disipulo ni Kristo

Nagpopoon na an satong novena para sa Divino Rostro. Ini nagpapagirumdom sa sato na an Dyos igwang lalawgon. Asin an lalawgon na ini, lalawgon nin pagtios. Bako syang lalawgon na bagong hawas sa beauty parlor, kundi lalawgon na bagong hawas sa pagkayod tanganing iligtas an lambang kalag nin tawo.

An lalawgon na ini nag-aalok sa sato sa pagsunod sa saiya. An lalawgon na ini iyo an satong Kagurangnan, an Paratukdo. An lalawgon na ini pano nin Kadunongan.

Sa tahaw kan saiyang pagtios, nakakatao pa sya nin ranga sa mga nagmumundo. Sya na pano nin lugad an lalawgon, nakakapaumay pa kan lugad nin kadaklan. Ini an dahilan kun tano dakul an boot magsunod sa saiya.

Alagad, sa pagsunod sa saiya, igwa syang hinahagad na kabayaran. Kaipuhan isikwal ta an kasiraman na itinatao kan kinaban. Kaipuhan bayaan nyato an satong pamilya, kapag-arakian, mga pagrogaring asin mga kayamanan. Ini huli man sana ta iyo ini an saiyang paarog. Iyo ini an saiyang pagkabuhay.

An buhay ni Jesus, buhay na talingkas sa mga kahaditan nin kinaban. Mayo syang pamilya na nag-uulang kan saiyang misyon. Mayo syang ina na nagsasabi: nonoy ko, dai ka magparapakiiwal sa mga Pariseo. Baka ka ipapako sa krus.

Mayo syang burubitbit na mga bag, na garo baga nagtitinda nin bulong. Kun sya nagtutukdo, nagbubulong nin mga may helang, mayo syang mga kagamitan. Asin dai nya ginagamit an kawaran kan mga kagamitan na nin bilang dahilang tanganing dai nya gampanan an saiyang ginigibo. "Pasensya na po ta mayo akong darang gas mask."

An pagsunod ki Kristo, dapat makanuod kan gabos nyang katukdoan. An ibang Kristyano, pinipili sana an gusto nyang tubudon. Garo nagkakakan sa ristorante. Igwa sanang pinipili sa menu. "Against ako sa corruption. Pero favor ako sa abortion and contraception. Kasi an dami nang mga tao." Alagad an tunay na disipulo nagsusunod kan gabos na katukduan ni Kristo.

An tunay na disipulo nagsusunod ki Kristo sagkod sa katapusan. Bako ining fun run, fun bike, fun walk. Mayong commitment sa bagay na ini. Kun pagal ka na, pwede ka nang magpahingalo. Ini an dahilan kun tano may mga tawong nagsusuko sa katahawan kan trabaho. Walang iwanan. Kun masunod kita, kadamay kita sa "passion, death and resurrection," an pagtios, an pagkagadan asin pagkabuhay-liwat.

An dispulos ni Kristo bakong sashimi, bakong medium rare, kundi 100% na nagdudusay kan saiyang buhay sa Kagurangnan. Bako syang 50-50: minsan may agom, minsan soltero. Dai pwedeng pribilehiyo lang kan posisyon, pero habo kan responsibilidad.

Anong klaseng disipulo kita? Nagtutubod daw talaga kita kan mga katukdoan ni Jesus? Kan saiyang mga paarog sa sato?

An eukarisitiya an paagi sa pagigin disipulo ni Kristo. Ini an eskwelahan kun sain an satong isip, puso asin kalag natutukdoan nin satong Kagurangnan. Sya an tunay na Kagurangnan asin kita an saiyang mga maimbod na parasunod.