Assumption

Ngunyan na Domingo, satong sineselebrar an sarong dakulang kapyestahan ni Maria, an kapyestahan kan Asunsyon. Magayon na gamiton ta an kapyestahan na ini sa paghorop-horop kan mga huring pag-andam kan nagdadangadang na Tercentenario kan satong debosyon ki Ina sa titulong Nstra. Sra. de Penafrancia.

An Asunsyon iyo an pagirumdom kan panuga ni Jesus sa lambang saro sa sato: an pagdagos sa saiyang Kahadean. An satuyang Ina, si Santa Maria, iyo an may kapot kan bandera. Sya an yaon sa enotan kan satong paglakbay pasiring sa kahadean nin Dyos. Huli kan maimbod na paglingkod ni Sta. Maria, biniyayan sya na makasakat sa langit asin makamate kan tunay na kaogmahan kaiba an satong Kagurangnan. Si Maria an satong panalmingan.

Baynte-dos na sanang aldaw bago kan Traslacion. Sa enot na aldaw kan bulan na Septyembre, gigibohon ta an Harubay, an paglibot kan mga deboto ni Ina sa Naga, sa pag-anunsyo kan paaboton na Tercentenario. Pupunan ini nin Diana amay nin pagkaaga. Ini sarong tradisyon nin pag-anunyso kan pyesta. Susundan ini nin motorcade palibot sa Naga, asin mga aktibidad sa pag-andam kan satong mga kalag tanganing kita gabos magin maninigo para sa dakulang selebrasyon na ini.

Sa Septyembre 9, bubuksan an First Bishop Francisco Gainza Trade Fair sa parking lot kan SM Naga. Pagkabanggi kaiyan, gigibohon an last 300 seconds countdown duman mismo sa Bishop Gainza Trade Fair. An Trade Fair na ini satuyang tabang sa mga sadit na negosyante na naghahanap paagi tanganing na mga produkto nin Bikol mamidbiran sa bilog na kinaban. Mangyayari ini sagkod sa Lunes, Septyembre 20, pagkatapos kan pyesta.

Sa Septyembre 10, mangyayari an tradisyonal na Traslasyon. Sa prusisyon na ini, kita gabos magpepenitensya, kaiba an gabos nyatong mga bisita hale sa man-iba-ibang lugar. Digdi mapoon an siyam na aldaw nin pag-novena, nin pagsul-sol, pagkumpisal, pagbalik-boot sa satong Kagurangnan. Mantang ginigibo an novena, mangyayari man an manlaen-laen na mga cultural shows sa patio kan Miguel Robles de Covarrubias, sa patio kan Cathedral asin sa Plaza.

Sa Septyembre 11 mangyayari an paglungsad kan Commemorative Stamps na gigibohon sa Holy Rosary Minor Seminary. Ini sarong regalo kan gubyerno sa mga deboto ni Ina ta tinugotan kitang magkaigwa nin sadiring stamp sa pagmidbid kan tolong gatos nang debosyon ki Nstra. Sra. de Penafrancia digdi sa Kabikolan. An stamp paagi tanganing mas lalong maipamidbid nyato si Ina sa bilog na kinaban. An stamp na ini an satong gamiton sa pagpadara nin mga greeting cards sa satong mga namomotan sa buhay.

Sa Septyembre 18 iyo an pagpuli ni Ina hale sa Cathedral pasiring sa Basilica. Sa katapusan kan novena, pagpenitensya asin pagbagong-buhay, kita minalakbay papuli sa satong Ama kaiba an satong namomotan na Ina. Ini an kahulugan kan sakay, kan fluvial procession. An prusisyon na ini sa salog kabaing kan satong sineselebrar nyato ngunyan na Domingo, kan pagsakatan ki Maria sa langit.

An mga manlaen-laen na aktibidad ngunyan na Tercentenaryo, kaiba na an mga constructions arog kan Porta Mariae sa Cathedral, an altar sa Basilica, asin an patio sa Penafrancia Shrine; an manlaen-laen na mga cultural shows; an mga fun run; an 12ng aldaw nin Trade Fair; an commemorative stamps; gabos ini mga paagi sana sa pagtugdas asin pagtugdok kan Kahadean nin Dyos digdi sa Kinaban.

Sa katapusan kan gabos na mga kasibotan na ini, saro sana an satong direksyon, saro sana an satong dudumanan, saro sana an satong pangiturugan. Ini an Kahadean nin Dyos na daing kasagkoran.