Ranga sa Tahaw Nin Kamundoan

Boot ko pong ipahayag sa saindo an mga nangingibabaw na kamatean dapit sa pagkagadan kan sarong padi na satong namomotan. Nagmumundo po an bilog na Arkidyosesis huli kan pagkagadan ni Fr. Nono Acompañado.

Asin nagmumundo kita huli ta sya sarong biktima kan naglalakop na kultura nin tsismis, pagbalubagi asin intriga. Kun may nagagadan na harani sa satong puso, labi-labi an satong kamundoan. Sa mga panahon na ini, mayo kitang ibang sinasarigan kundi an pakidumamay kan satong mga partidaryos, mga kataraid asin mga katrabaho. Alagad, sa pangyayaring ini ki Fr. Nono, bakong pakidumamay, kundi tsismis, pagbalubagi asin intriga an satong nakua.

Pira sa sato an naoogmang magsubaybay kan mga tsismis, intriga asin pagbalugabi? An mandatang kulturang ini napapasarig kan presenteng gibo-gibo sa media. Kan mga naka-aging aldaw, an pagkagadan ni Fr. Nono ginamit kasangkapan kan media para sa saindang pansadiring interes. An iba, ginamit sangkalan tanganing duhagion an Katolikong Simbahan. Mayo na nganing pagmakulog sa lanit kan mga lugad na sinasapo kan saiyang pamilya, paulit-ulit pang pinagraratakan an pagkatawo ni Fr. Nono na mayo lamang labot sa kunsyensya. Sa tahaw kan saiyang kagadanan, mantang nagmumundo asin nagsasakit an saiyang pamilya asin mga katood, mga kapwa padi asin bilog na Simbahan, padagos pa giraray an pag-ulog-ulog, an paghusga asin an pagkundinar sa saiya.

Duwa lang po an totoo sa mga nadangog nindo. Enot, si Fr. Nono gadan na. Ikaduwa, totoo man na an pulis nag-iimbistiga kan saiyang kagadanan. Sa luwas kan duwang katotoohan na ini, gabos alegasyon sana.

Sabi kan sarong taga-media, an ginigibo ninda trabaho sana daa. Dai daa ninda pinag-si-"sensationalize". Taraman nindo kaiyan an magurang na nawaran nin aki. Taraman nindo kaiyan an mga padi na nawaran nin tugang. Taraman nindo kaiyan an mga seminarista asin seglar na nawaran nin pastor. Mantang kita nagsasakit maghanap nin kahulugan asin kapaliwanagan kan mga mapapait na pangyayaring ini, padagos na ginuguragod an satuyang lugad asin nginingiritan an satong pagsakit kan mga nagkapirang iresponsableng taga-media.

Sabi nin Kagurangnan, "an sisay man saindo na dai nagkasala, iyo an magbatikal kan enot na gapo." (Jn 8:7) Asin ano an nangyari? Saro-saro sindang naghali. Gabos kita mga parakasala. An pag-ulog-ulog nin kaluyahan nin tawo sarong hipokrisiya, sarong pagsagin-sagin na dapat nyatong isikwal.

Ngunyan pa sana, kaipuhan tang manindugan tumang sa kulturang ini nin pagbalubagi, tsismis asin intriga, pag-ulog-ulog asin panraratak, patin pagsabwag nin espiritu nin kaungisan asin pagtumang sa satong relihiyosong kultura asin sa satong Katolikong simbahan.

An kultura nin intriga kalaban kan sibilisasyon, kaulangan sa pag-uswag kan tawo, pag-ulog-ulog sa tradisyon kan Simbahan. Sagkod nuarin kita matugot na timakan an satong dignidad kan mga nagkapirang media practitioners tangani sana sinda magin sikat asin makalangkaw sa saindang mga ratings?

Ikinakamundo ta an pagkagadan kan satong tugang. Ikinakamundo ta man an pagkagadan kan etika asin propesyonalismo sa media na iyo kuta an may katungdan na magtaong tamang bareta na mayong dagdag na tsismis, pagbalubagi asin halong intriga.

Sa katapusan, ano an makukua ta sa pag-ulog-ulog, sa pagtao nin bareta na naghuhusga nin kalag, na garo baga nagsasayaw sa ibabaw kan gadan, siring sa mga buwitre na naglalayaw-layaw tanganing pagpyestahan an mga gadan?

An kaipuhan kan pamilya, kan mga katood, kan mga tugang na padi, kan bilog na Simbahan sa Caceres, sarong ranga sa tahaw nin pagmundo, liwanag sa tahaw nin diklom, pagkaherak sa tahaw nin paghusga asin pagkundinar.