An Pamibi

An mahibog na librong Katesismo para sa Katolikong Simbahan igwa man sanang apat na harigi: an Kredo; an Pitong Sakramento; an Sampolong Togon; asin an Pamibi nin Kagurangnan.

An mga babasahon ngunyan na Domingo manunungod sa ika-apat na harigi, an pagpamibi.

An enot na binasa manunungod sa pakikipagtawadan ni Abraham sa Dyos tanganing dai tunawon an Sodom asin Gomora. An istoryang ini dapat saboton sa lado nin pagpapamibi. Si Abraham nakiki-olay sa Dyos na garo nya amigo. Dai sya nasusupog magtaram. Dai nag-aalangan na magtawad. Ini an tunay na pagpamibi. Makusog an boot na maghagad kan kinakaipuhan.

Tano ta makulit si Abraham? Tano ta dai sya nasusupog? Huli ta an hinahagad nya bako man para sa saiyang sadiri, kundi para sa iba, para sa banwaan. Ikaduwa, yaon duman an saiyang mga padangat, mga namomotan. Boot sabihon, an pagkamoot sa kapwa iyo an nagtutulod sato sa pagpamibi. An tawong dai nagpapamibi, dai namomoot. Mayong pagkamoot.

An ika-duwang binasa, pagpasabot sato kan proseso nin pagpamibi. Ini nagpopon sa pagpenitensya, sa paghorop-horop kan satong kasalan sa Dyos. Sabi ni San Pablo, kita ilinubong huli sa bunyag. Kita binuhay liwat huli man sana kan parehong bunyag. Ini an buhay ni Jesus: an pagsakit, pagkagadan, asin pagkabuhay liwat. Kitang mga Bikolano nakakasabot kan duwang mahalagang prusisyon durante kan Peñafrancia fiesta. Enot iyo an traslacion. Ini an satong paglubong, an satong pagpenitensya. An mga boyador nakabitis na nagpapasan kan andas ni Maria asin Divino Rostro. Alagad, pagkatapos kan siyam na aldaw nin pagpamibi, ginigibo an magaya-gayang selebrasyon kan pagkabuhay liwat sa paagi kan sakay o fluvial procession. Maogmang gayo kun sa fluvial procession, an mga tawo nag-oogma huli kan saindang kapangganahan sa kasalan.

Sa ebanghelyo, nadangog nyato an pagtukdo ni Jesus kan saiyang pamibi sa saiyang mga disipulo. An hapot, tano ta an Dyos magpamibi sa kapwa Dyos? Tano ta si Jesus na mayong kasalan kaipuahn pang magpamibi?

An pamibi maghahale sana sa Dyos asin madadangog sana nin Dyos. Kun kaya an pamibi iyo an pakikipag-olay nin Dyos sa kapwa Dyos. Mayong tawo, na kun sya sana, makakapagpamibi sa Dyos. Kun kita nakakapagpamibi, ini huli kan Espiritu Santo na iyo an nagdadara asin nagtutulod sato sa pagpamibi.

Sabi ngani ni Santa Teresa kan Lisieux. An pamibi iyo an pagdaguso kan puso; an simpleng pagtingkalag sa langit, an kurahaw nin pag-ako asin pagkamoot, kinukugos parehong pagsakit asin kaogmahan. Asin an Katesismo nagdadagdag man: an pagpamibi iyo an pag-angat kan isip asin puso sa Dyos o an paghagad nin karahayan sa Dyos.

Labing sarong bulan na sana bago an ikatolong gatos kan satong debosyon ki Nstra. Sra. De Peñafrancia. Lugod, dai kita malamos sa kadakulan kan satong mga kasibutan. Magpamibi kita. Mayo kitang ibang hanap sa mga selebrasyon na ini kundi an kaomawan sa Mahal na Dyos.