Tulisan, Biktima, asin Samaritano

An istorya dapit sa Marhay na Samaritano saro sa pinakamidbid na usipon sa ebanghelyo. Kadakul kan mga adal na pwede nyatong paghurop-huropan sa istoryang ini.

Enot, pinapasabot digdi an satong kamugtakan sa kinaban. Sa kinaban, igwang duwang klase nin tawo: an tulisan asin an biktima nin tulisan. An biktima bako sanang biktima nin tulisan, kundi biktima man nin mga tawong mayong pakiaram. Kadakol an nagagadan sa dalan huli ta mayong gustong magtabang.

Bilang biktima, kita may mga hararom na lugad. Lugad, bako sana sa lawas huli kan satong mge helang, kundi pati sa puso huli kan mga karatan sa kinaban. Nagkakahelang kita sa parong kan basura, sa latak sa tubig na satong iniinom, huli man sana kan mga karatan na tumang sa kapalibutan. Lugad an satong mga puso huli ta kita o myembro kan satong pamilya biktima nin inhustisya. Binadil, ginadan, alagad dai aram kun sisay an tulisan. An satong banwaan pano nin mga krimen na mayong mga kriminal.

Bilang biktima, garo kita idtong paralakbay na binugbog na, hinabunan pa. An pangkikikil sarong cycle of life sa mga Pilipino. An media mangkikikil sa pulitiko, an pulitiko mangkikikil sa publiko. Kun igwang information highway huli kan globalization, igwa man kitang highway robbery. Sa satong paglakbay sa banwaan, dakul kitang masasabutan na mga tulisan: mga pulis-kotong o kotong cops; mga AC-DC media men (attack and collect-defend and collect).

Kadakol kaulangan sa satong pagbyahe. Kadakul mga paratudok sa satong paglakbay. Ini an dahilang kun tano ta imbes uswag, ulnok an nangyayari. Dai kita nagtatalubo sa buhay banwaan, sa buhay ekonomiya, sa buhay pulitikal. Imbes na uswag Pilipinas, ulnok Pilipinas. Kadakul an nag-aaprubitsar kan satong mga kaluyahan.

An satong pagkamakasadiri nakakalugad kan puso nin iba. An satong pagkarungaw sa pagigin sikat, bida, pogi, sa mga medalya asin mga awards, nakakapaduling kan satong tunay na pagkasabot kan kinaban. Nakakaparibong an mga ini kun ano an pagkakaiba kan pantasya sa totoong kinaban, kan alamat asin kan true-to-life-story, kan fiction asin kan non-fiction. An pagtaong doon sa mga maskara iyo an pagigin dahilan kan pagdakul nin mga tawong mayo na nin pakiaram asin pagmalasakit sa mga biktima nin mga tulisan. Mas gusto nindang tubudan an mga statistics, an mga nasa websites, kisa sa mga totoong nangyayari sa plasa, sa mga tinampo, sa mga squatters area.

Alagad, dai kita mawaran nin paglaom. Si Jesus an Marhay na Samaritano. Sya nagsusunod sa satong mga inaagihan. Kun ano man an mangyari sa sato sa dalan, sya siguradong makakaaram. Asin sya andam sa pagtabang.

An Banal na Eukaristiya, an pagkumpisal, asin iba pang mga gawe nin kabanalan iyo an mga tabang tanganing an satong mga lugad, sa puso asin kalag, tolos-tolos man na maumayan