Mensahe Para Sa Cuaresma 2010

Mga tugang, patapos na an banal na panahon nin Cuaresma. Napapanahon na hapoton niato an satong sadiri: Ano na an naginibo niato tanganing makapuli kita sa Mahal na Dios?

Totoo an cuaresma panahon nin pag-ayuno, abstinensya, pag-limos asin pag-sakripisyo. Pwedeng an gabos na ini nagibo na niato. Kun paghohorop-horopan niato, an gabos na mga gaweng ini sarong pag-negar sa satuyang mga sadiri. Iyo ini an inaapod niatong bulong sa kasalan na mayong iba kundi an pagpa-orog kan satong mga sadiri.

Mas makahulugan an paggibo niato kan mga gaweng sakripisyo kun malinaw sa sato kun ano an katuyuhan kan satong mga ginigibo. Iniimbitaran ko kamo gabos na gibohon an pagsakripisyo nindo ngonyan na cuaresma bilang saindong pamibi asin gaweng pagkamoot para sa satuyang banwaan; para sa satuyang nasyon na nangangaipo kan banal na presensya nin Mahal na Dios. Hinahagad nin Mahal na Dios na sarabay kitang makapuli sa saiya; sarabay kitang mga Pilipino na magbaklay pabalik sa Mahal na Dios bilang sarong banwaan.

Inaagyat ko kamo gabos na lingawan muna an kolor nin politika asin an pansadiring ambisyon sa maabot na eleksyon. Kinakaipuhan na makahawas muna kita sa kaoripnan nin pagigin makasadiri. An tunay na pagpenitensya iyo an pag-isip kan ikakarahay kan satong kapwa asin kan satong banwaan. An kruz ni Cristo dakulang tanda kan Diosnon na pagkamoot: an pagkamoot na dinaog an kagadanan; an pagkamoot na nagtaong tunay na katalingkasan; an pagkamoot na nagtaong tunay na paglaom sa satuya.

Si Maria, an satong Ina, an Ina kan Pagkamoot na nanitawo, ibahan lugod kita ngonyan na Cuaresma sa pamitisan kan Krus tanganing tokdoon kita kan dalan nin Diosnon na PagkamootI

 

+Leonardo Z. Legaspi, O.P., D.D.

Arzobispo kan Caceres