Tanyugon Mo Kami

“Magpakamarahay kamo siring na an saindong Ama sa langit marahay.” Sabi kan sarong pulitiko, “Sarong gatos na serbisyo publiko.” Sabi man kan sarong botante, “Sarong gatos na serbisyong mayo sa boot.” Mayo sa boot na paglingkod – ini an dahilan kun tano ta dawa an satong mga lideres sarong gatos nang yaon sa kapangyarihan, mayo pa man giraray na pagbabago sa satong nasyon. Padagos kitang naglalangoy sa kumunoy nin kasakitan.

 

“Magpakabanal kamo siring na an saindong Ama sa langit banal.” An ebanghelyo nagsasabi na an tamang sukulan nin karahayan asin kabanalan iyo an satong Ama sa langit. Dapat, an satong karahayan asin kabanalan labi sa karahayan asin kabanalan kan mga demonyo. An demonyo nakakasungkit man nin kadakul na mga awards dawa mayo sa boot an saindang paglingkod sa banwaan. Idtong kapalpakan sa pagreskyu kan mga hostages sarong halimbawa kan paglingkod na mayo sa boot. An demonyo igwa man nin kusog boot na makilaban, lalo na kun namimilgro an saindang pwesto sa gubyerno, kun inaatubang ninda an kaso nin impeachment sa kongreso. An demonyo matibay magpalusot sa krimen nin pangangamkam. Tinatakpan an karatan dawa pa sinda magbadil kan sadiri. Tamang-tama an ebanghelyo ngunyan. Kita pinapatanidan na bako an mga halimbawa na ini an dapat nyatong arogon. Bako sinda an satong panalmingan. An Dyos sana an satong sukulan.

 

Kun kita magpahiling nin pagkamoot, dapat labi pa ini sa ipinapahiling kan mga lideres sa banwaan. Sinda nagtatao kan tabang na inanaban. An mga tada-tada sa kwarta sa jueteng asin sa droga iyo an ipinapanandan sa panahon nin eleksyon. An tunay na pagkamoot yaon sa pagdusay kan sadiring buhay para sa kapwa. Dawa mayong gayong halagang material, an mahalaga iyo na ining pagtabang gikan sa karahayan nin boot. An tabang nin mga pulitiko nakakabihag. An tabang nin Kristyano nakakapasarig.

 

Likayan an mga nakikisakay sana sa simbahan. Igwang mga tawo na mabutwa sana sa simbahan kun igwang karakanan, kun igwang pagkakataon magbenta nin insurance o ano pa man na mga paninda. Alagad, kun alukon mo na sinda na magpartisipar sa recollection o retreat, o sa mga pagtabang sa mga kasaraditan, kun alukon mo na sinda na manindugan tumang sa karatan sa gubyerno, garo sinda mga hangaw. Madaling palidon kan huyop-huyop nin doros. Dai mo na sinda mahihiling sa saindong parokya. Ini an mga tawong maglilingkod alagad mayo sa boot.

 

Si Francis Drake, sarong bantog na paralayag, katambad sa kabantugan ni Christopher Columbus, nagsurat nin magayon na pamibi tumang sa pagkabuhay na mayo sa boot: