Solemnidad ni Kristong Hade

Yaon na kita sa pinakahuring Domingo kan Kalendaryo Liturhiko. Asin sa sunod na Domingo, mapoon na naman kita nin bagong taon sa paagi kan Enot na Domingo nin Adbyento.

Sa Domingong ini, pinapagirumdom kita kun sisay an tunay na Hade sa satong buhay. Sya mayong iba kundi si Jesus na satuyang Kagurangnan. Sa solemnidad na ini, tinutukduan man kita kan tunay tang pagmidbid kan sadiri asin kan tamang pagkasabot kan lider nin banwaan.

An debosyon ki Kristong Hade saro sa maluyang debosyon sa satong nasyon. Natatahuban sya kan debosyon sa Penafrancia na kun sain si Jesus saro sanang omboy. O sa Santo Nino na kun sain si Jesus sarong omboy. Alagad, an debosyon ki Kristong Hade mahalaga man sa sato.

Sa paagi kan debosyon na ini, magkakaigwa kita nin pagkasabot kan halaga kan lider sa satong buhay. Sosog sa satong ekspiryensya, igwa kita sa satong nasyon nin krisis sa liderato. Kulang an mga lider na may tunay na pagmakulog sa sato asin sa satong banwaan.

Ano an mga pagirumdom kan mga babasahon ngunyan?

Enot, kita mga peregrino. Kita mga byahero. Kita mga naglalakbay pasiring sa Kahadean nin Dyos. An salmo iyo an nagtataong paliwanag kaini. An satong kaipuhan bako an kinabanon na kasiraman kundi an langitnon na kaogmahan. Bilang peregrino, dai dapat kita malingaw kan satong hinahanap, kan satong padudumanan. Bakong ranga asin ginhawa nin laman, kundi ranga asin ginhawa nin kalag. An satong padudumanan: Kahadean nin Dyos.

Ikaduwa, sa paglakbay na ini, an satong lider igwang kakayahan siring ki David. Makukua ta ini sae not na binasa. An lider dapat igwa nin dunong. Dai sapat na sya igwa nin charm, nin karisma sa tawo. Mahalaga na igwa sya nin hararom na pagkasabot asin mahiwas na paghiling tanganing matawan kita nin tamang giya sa satong paglakbay. An saiyang kakayahan ginagamit tanganing makatao nin tunay na pangataman sa satong buhay sagkod na makaabot kita sa satong padudumanan. An lider inaapod nyatong pamayo. Sa payo kan pamayo, yaon dapat an dunong.

Ikatolo, ipinapamidbid sa sato an tunay na Hade, si Jesus. Sa ebanghelyo, ipinapamidbid sa sato si Jesus bilang Hade bako huli kan saiyang magagayon na katukduan o huli kan mga milagro na saiyang ginibo. An kapahayagan kan saiyang pagkahade yaon sa pagtuya-tuya sa saiya; yaon sa paghampak sa saiya, yaon sa pagkorona saiya nin mga tunok; yaon sa pagpasan nya kan krus; yaon sa pagpako saiya sa Kalbaryo.

An saiyang kakayahan sa pag-ako kan kasusupgan, an pagtios kan saiyang kasakitan sa bukid nin Kalbaryo, iyo an nagpatotoo na si Jesus iyo an tunay na Hade nyato gabos.

Sisay an mga lider sa satong banwaan na makakaarog sa saiya? An mga pulitiko naghahanap kakampi; Si Jesus naghahanap parasunod. An mga pulitiko nambabakal boto; si Jesus nakikilimos nin tiwala asin pagtubod. An mga pulitiko nagmamasaker nin mga kaiwal; si Jesus nagpapabago kan buhay nin mga kaiwal. Sa puso kan mga lider nyato iyo an bisyo. Sa puso ni Jesus na iyo an tunay na Hade iyo an birtud. Igwa kita nanggad nin krisis sa liderato. Kaipuhan tang gayo nin mga lider na nagsusunog sa paarog ni Jesus.

Siring ki Jesus, namimidbiran kita bilang mga parasunod nya, bilang mga disipulo, sa satuyang kakayahan na magpasan kan krus na itinao sa satuya. Asin siring ki Jesus, ipapako kita sa krus kun kita saiyang katuwang sa pagmukna kan saiyang kahadean digdi sa satong kinaban.