An Tunay na Kapangyarihan

Satong sineselebrar ngunyan an Solemnidad nin Satong Kagurangnan, an Kristong Hade.
Para sa mga mayo nin pagtubod, an pagkahade ni Jesus saro sanang pag-ulog-ulog kan satong pagkatawo. Ini an paghuna ni Nietzsche. Dakulang ulang sa pag-uswag nin tawo an pagtubod na igwa nin Dyos, na sya Hade, alagad nakapako sa kruz. An kaisipan na ini, para sa saiya, sarong karungawan. Ini an dahilan kun kaya saiyang ibinariwas sa bilog na kinaban na Gadan an Dyos.
Ini man an paghuna kan sarong bilanggo na kaiba ni Jesus duman sa Kalbaryo. Siya tinaraman na kun ika totoong Hade, ligtasan an saimong sadiri, asin ligtasan man ako. Ini bakong bunga nin pagtubod kundi sarong pag-ulog-ulog.
Tano ta si Kristo na nakapako sa krus inaapod nyatong Hade? An tunay na hade makapangyarihan. An meyor nadidisiplina an saiyang mga pulis. An gubernador nakakamukna nin mga lugar para sa mga turista. An sanggunian nakakahaman nin mga batas para sa ikakarahay kan banwaan. Sa paagi kan saindang kapangyarihan, napipiripit ninda an takyag kan iba tanganing mangyari an boot nindang mangyari.
Si Jesus mayo kan siring na kapangyarihan. Dai nya kayang biribidon an satong takyag tangani na kita pasunudon. Dai nya kita kayang pasunudon sa paagi nin pagpatakot. Mayo sya nin mga pulis. Mayo sya nin kwarta. Mayo sya nin Sanggunian o ano pa man na koneksyon sa Malacanang.
Sya nakapako sa krus. Alagad sya an satong Hade.
An tunay na kapangyarihan bakong pisikal kundi espiritwal. Halimbawa kaini iyo an kapangyarihan nin marhay na paarog. An mahigos na magurang inaarog kan saindang mga aki. An mainadal na titser inaarog nin mga estudyante. An maurop na pulitiko tinitingkalag nin mga syudadano.
An marhay na lider namomotan, dai kinakatakutan. An marhay na lider ginagalang, dai ikanakauyam. An saiyiang kapangyarihan mayo sa pag-ipit o pagpatakot, kundi sa saiyang marhay na paarog.
Huli kan bunyag, kita gabos nagin kahiras ni Kristo sa saiyang pagkahade. An satong pagpangataman kan satong buhay para sa saiyang kahadean iyo an satong katungdan sa saiya.
Kun nadalan nindo an sineng Silence of the Lambs, magigirumdoman nindo an linya ni Antholy Hopkins: Who is in control? What did you lose? What did I take?
Ngunyan na Dominggo, pinapagirumdom kita na si Kristo an may kontrol kan satong buhay. Ini huli kan saiyang espiritwal na kapangyarihan. Asin ano an nawara sa sato? Ano an itinao ta sa saiya? Nawara sa sato an satong mga guni-guni asin bana-bana. Sya an satong Hade. An saiyang pangiturugan iyo an satong pangiturugan. An saiyang paglaom iyo an satong paglaom. An saiyang kahadean iyo an satong kahadean.