Atomic Atom

NAGPOON na an bagong season kan Pinoy Big Brother. Binuksan na naman an pintuan kan harong kan tingog na inaapod kuya. Dai mahaloy an ratings kan ABSCBN sa oras kan PBB maulanto asin ikokonsiderar an nasabing pasali—kun pasali man nanggad ini—bilang iyo an igwang pinakadakol na paradalán sa bilog na nasyon. Biyong kikitikon an mga hirog kan paradalan kun igwang nabibilog na pagkadayupot sa siisay man na duwang housemate. Maaanggot an mauungis an iba kun igwang maluwas na siring ki Wendy Valdez na inaapod ni Kristian na bruha. Masimpatiya an kadaklan kun igwang pag-amin na gigibohon, siring sa nangyari ki Rustom Padilla. Kadakol pang ibang mga bagay an dinadara kan pasaling ini sa satong mga Pilipino, mga bagay na para sa ordinaryong paradalan, mga kangangalasan, na matarakâ sa sato asin matulod tanganing temporaryong makapanlingaw kan satong mga sadiri asin ibabad an sadiri sa inaapod tang mga Bikolano na pag-atom. Kun makanos man o magayon, dai ta maiinegar na kadakol an igwang ugaling mapang-atom sa gibo kan iba. Poon sa pagmata hanggan sa pagturog saksi kita digdi: mga matang nakaturuhok sa sato, nakahiling sa satong mga ginigibo; patagong nagdadangog sa satong mga urulay-ulay; ini si mga taong garo baga binabayadan sinda para aramon sana an satong mga agi-agi. Siring sinda ka Boy Abunda asin Cristy Fermin, an lain lang ta bako kitang mga artista. Orog na sa mga subdibisyon, na minalakop ngunyan sa mga siyudad, dai kita mangalas kun aram kan iba an panira ta subanggi, o kun siisay an kaulay ta sa telepono kan sarong aga. Dai man kita mamamaguhan kun pati an ati tang inaapon tanganing hapiton kan truck nin basura, aram ninda kun an an mga minakumpunir kaini. Siring man na dai naman bago kun aram ninda an sabon na ginagamit ta pagkarigos, o an brand kan toothpaste na gamit ta. Ano pa daw an mga iwal nin mag-agom, aranggutan nin magturugang asin diringkilan nin magkataraid na harong? Arog kaini an mga kongkretong halimbawa kan pag-atom, na nagigin tsismis, na nagigin kangangalasan. Bako daw na an urulay-ulay pag-atom minapoon sa hapot na, “Aram mo, subanggi? o kan sarong aldaw?” na susundan kan mga bara-baretang nakalap.