Babaye, ipinagboot
kan karpinterong aki mo
an samong pagkakan saiya.
Sa saiyang mga ngimot man
nagluwas an kahurutan
na inomon siya kan gabos.
Aram niyamong ini makulog
asin matarom sa saimong daghan.
Alagad, ika man nagpahunod.
Babaye, tadaw ta pirmi
ika na sana an minapahunod?
Tadaw ta ika na sana
an minasapo kan kulog?
Tadaw ta ika an sa daghan
may nakatadok na punyal?
Ay, abaa nang kasakitan!
Tibaad, ini man an dahilan
kun tadaw sa pagpintakasi
niyamo ngunyan, an inaagod
mi babaye man. Labi-labi
an samong kamawotan
na makiparte sa gabat kan
saiyang andas. Mala ta minsan
nakakaagid kami sa mga kapay,
daing kabaing an pag-otob kan panata.
Tibaad iyo ini an samong maldisyon
huli ta kami mga sumbikalan.
Kami na sana man an pagabat
sa maninigo kutang kagianan.
Pagiana man an samong mga daghan.
***
Maogmang fiesta sa saindo gabos!