An Dyos Satong Kaogmahan

An mga babasahon ngunyan na Domingo mga pagirumdom na an Dyos iyo an burabod nin kaogmahan asin katuninongan.

Sa enot na binasa, nadangog nyato an halaga kan relasyon kan Jerusalem sa mga Hudiyo, an halaga kan banal na syudad sa mga tawo. An Jerusalem sarong sagradong syudad. Sya an sentro nin pagsasadyos, nin pagpapamibi, nin peregrinasyon. Yaon sa Jerusalem an templo, an harong nin Dyos. Tanganing ipasabot ini sa mga Hudiyo, ginamit kan parasurat an ladawan kan Ina na nagpapasuso sa aki. An aki nagkukua nin nutrisyon sa saiyang ina. Matuninong, maogma, trangkilo an sarong aki na nagsususo sa ina. Ini an buhay kan mga Hudiyo kun ginagalang ninda an Jerusalem. An syudad na ini an nagtatao nin buhay, kaogmahan asin katuninongan sa mga tawo.

Asin ini man an nagdadara nin labi-labing kamundoan kun ini rinurumpag kan mga dayuhan, kun ini inuusmakan nin mga kaiwal na mga nasyon.

Magayon an paralelismo kan babasahon na nin sa satong ekspiryensya sa syudad nin Naga. An "templo" nin Dyos yaon sa Naga. Ini an dambana kan satong Mahal na Ina, si Birhen de Peñafrancia. Sa Naga makukua an sentro kan lokal na Simbahan, an Arkidyosesis na iyo an ina kan mga dyosesis sa kabikolan. Sa bulan nin Septyembre, an Naga an sentro nin peregrinasyon. Mga deboto nagdadayo hali sa man-iba-ibang lugar sa pag-arang sa Mahal na Ina asin sa pagsamba sa Mahal na Dyos.

An Naga dakulang kaogmahan kun ini ginagalang; dakulang kamundoan kun ini inuusmakan nin mga dayuhan. Ipamibi nyato na an gabos na tawo masabotan na an Naga, siring sa Jerusalem, sagradong syudad, sentro nin peregrinasyon, lalong-lao na sa panahon nin Septyembre.

Sosog sa Salmo, an buhay nin Kristyano, buhay nin pag-omaw sa Dyos, bakong pag-ulog-ulog sa Dyos. Buhay ng pagmamahal, hindi buhay ng pagmumura. Ang "mahal" panapahalagahan. An barato o "mura", pinapabayaan. Dai pinapahalagahan.

Sa ika-duwang binasa, pinapagirumdom kita na dai maghambog kan satong mga "achievements" asin mga "awards." Bako iyan an basehan kan pagtiwala nin tawo sa sato. An tunay na mga "awards" iyo an mga sakripisyo na idinudusay nyato para sa Kahadean nin Dyos.

Asin an ebanghelyo ngunyan nagtutulod sa sato na magin mga misyonero. Bako lang kitang paradangog nin sermon, o para-atendir nin mga recollection asin iba pang mga formation. Kita man mga paratukdo: sa laog kan pamilya, sa eskwelahan, sa trabaho, sa munisipyo.

Lugod, maisabuhay nyato an mga pagirumdom na ini: an Dyos an satong tunay na buhay, kaogmahan, asin katuninongan.