Sisay an tunay na sikat?

Sisay an tunay na sikat? Sisay an tunay na paladan?

Si Jovit Baldovino, an Grand Winner kan Pilipinas Got Talent? Sya dating paratinda nin siomai tanganing makatabang sa pamilya. Ngunyan, sya an pinag-uurulayan sa bilog na Pilipinas. O si Manny Pacquiao, an sikat na boksyador sa bilog na kinaban, na dating nagdulag sa harong huli sa makuring pagtios? Asin ngunyan saro nang bilyonaryo, kongresman pa.

Sisay an tunay na sikat? Sisay an tunay na paladan?

An apat kaya na mga Arroyo na kabilang sa mga milyonaryong kongresista asin yaon sa Top 30 na mga mayayaman na kongresista, sosog sa bareta ngunyan? Sinda kaya idtong mayayaman na pinag-aaraan kan mga paralako, mga trabador, na aroaldaw naghahandal kun sain kukuanon an ipapakakan sa saindang pamilya?

Sisay an tunay na paladan? Sisay an tunay na sikat?

Sinda kaya na mga aki ni Jose Rizal, o mga nalahian nin mga Kastila, o kapartido ni Noynoy Aquino, o mga Direktor kan CASURECO II?

Sosog sa ebanghelyo ngunyan, an kapaladan mayo sa satong minana o mamanahon, mayo sa kayamanan na sinungkitan o kinamkáman, asin an kasikatan mayo sa mga onra na tinatao sato kan mga tawo, kan satong mga tagahanga. An kapaladan mayo sa minana sa mga magurang o ninuno kundi sa yaon sa satong ipapamana sa masurunod na kapag-arakian. An kasikatan mayo sa pagpabida sa mga tawo, kundi sa pagpabida sa Mahal na Dyos.

Si Emily Dickinson nagsurat nin magayon na tula: "Kun ako makadarang liwanag sa madiklom na agihan kan sakong kapwa; kun makatabang ako nin sarong kalag na maliwanagan dapit sa buhay asin katungdan, tanganing mabendisyonan an sakong tugang; kun makapunas ako nin luha sa anuman na lalawgon nin tawo, dai nasayang an sakong buhay mantang ako yaon digdi sa kinaban."

"Kun ako makapagtanom nin kahoy sa gilid kan dalan nin buhay, asin sa limpoy kaiyan makapagpahingalo sarong paralakbay, dawa bako man akong siring kagayon sa saiya, ako totoo pang paladan - dawa mayong nakakaaram kan sakong ngaran, o magdara nin burak sa sakong linubngan, dai nasayang an sakong buhay mantang ako yaon digdi sa kinaban.

Tugon ni Jesus: "An sisay man na boot magsunod sa sako: lingawan an sadiri, pasanon an krus aroaldaw, dangan magsunod sa sakong mga lakdang."

Ngunyan satong ginigirumdom an mga ama sa laog kan pamilya. Tawan ta sinda kan kaipuhan nindang pamibi, suporta, inspirasyon, tanganing magampanan ninda an dakulang papel sa pag-ataman kan saindang pamilya susog sa pag-ataman kan Mahal na Dyos sa gabos na pamilya sa bilog na kinaban.