Santisima Trinidad

For my column piece this week, I am sharing below my homily which was delivered last 2010 May 30, on the occasion of the solemnity of the Holy Trinity.

Ngunyan satong sinisilebrar an kapyestahan kan Santisima Trinidad. Sosog sa satong nanudan sa katesismo, ini an misteryo nin mga misteryo na tinutubudan nin satong Katolikong Simbahan.

Misteryo huli ta dai marurip nin isip nin tawo. Alagad dawa dai marurip nin isip nin tawo, dai nangangahulugan na dai na ini totoo. Asin susog ngani sa satong katukduan, ini an katotoohan kun sain nakadepende an gabos na katukduan kan simbahan, orog na an mga katukduan kan simbahan dapit sa buhay nyato sa banwaan.

An konsepto nin Santisima Trinidad bakong lalang o imbensyon kan isip nin tawo. An mga sine arog kan Clash of the Titans asin Percy Jackson halimbawa nin mga konsepto nin dyos na linalang sana nin isip nin tawo. An mga usipon dapit sa mga dyos-dyosan nin mga Griego sinurat nin sarong tawo na midbid sa pangaran na Homer. Malinaw na an konsepto nin Santisima Trinidad yaon sa kapahayagan mismo nin Dyos. Sya nagpamidbid sa mga tawo sa lawig nin panahon, sa laog kan kasaysayan nin tawo. Sa pagbuklit kan enot na mga pahina kan Genesis sagkod sa mga huring pahina kan Kapahayagan, nagpapamidbid an Dyos bilang saro sa natura, alagad tolo sa persona; saro sa sustansya, alagad tolo sa pagpamidbid sa mga tawo.

An Dyos Ama iyo an kaglalang, kagboot asin kagsugo. An Dyos Aki an sinugo, an nag-utob kan kabutan nin Dyos Ama. Sya an kagtubos sa paagi nin pagtios, pagkagadan, asin pagkabuhay-liwat. An Dyos Espiritu Santo iyo an isinugo nin Dyos Ama asin Dyos Aki asin iyo an nagtataong kapangyarihan sa satong Simbahan. Sasarong Dyos sa manlaen-laen na katungdan.

An Santisima Trinidad dai nagpapakulog kan isip nin tawo. Bako syang crossword puzzle o soduku na pampatalas nin isip tanganing dai tamaan nin Alzheimers disease. Bako man syang libangan. Kundi sya sarong kapahayagan, sarong pagpamidbid, sarong modelo nin buhay nin tawo sa pamilya asin sa banwaan.

Pagkasararo dawa manlaen-laen an lahi, lingwahe, pananaw sa buhay, relihiyon asin pulitika. Manlaen-laen alagad dai nagkakabaranga. An Ubos-kun-Ubos sarong kanser nin demokrasya. Sarong porma nin insecurity sa kapangyarihan. Ini an ginibo ni Hitler. An gabos na mapadalagan kan gubyerno nin Alemanya dapat myembro kan Nazi Party. Ini an konsepto kan kumunismo. Saro sana an partido. Asin an sarong partido iyo an matao nin sarong depenisyon kan kinaban.

Bako ini an katukduan kan Santisima Trinidad. Mahalaga an paggalang kan kalaenan nin mga tawo, na may iba-ibang regalo asin kakayahan. Alagad sa tahaw kan pagkakaibang ini, yaon an pagkasararo, yaon an kaburunyugan.