Duwang Klaseng Hanap-Buhay

Allow me to share below my homily for the Sunday Mas on August 2:

An plano nin Dyos mas halakbang kisa sa plano nin tawo. An pangiturugan nin Dyos mas mahiwas kisa pangiturugan nin tawo.

Kan nakaaging semana, si Jesús nagmilagro. Binasog an mga tawo nin pagkakan. Huli ta sinda nasiraman asin naogma, boot na ninda si Jesus na gibuhon hade. Siring sa satong nasyon, labi-labi an pagtios kan mga Hudiyo sa kamot kan mga Romano kaidtong panahon. Naghihidaw sinda nin sarong marhay na lider. Nahihiling ninda ini ki Jesus. Alagad dai nagpatukso si Jesus. Mas mahiwas pa an saiyang pangiturugan para sa sato. An saiyang social action bako sanang feeding program.

Sabi nya sa ebanghelyo ngunyan, "dai ka magpagal para sa kakanon na nalalapa, kundi sa kakanon na magtatao saimo nin buhay na daing kasagkoran." Kaya si saiyang feeding program pansamantala sana. Panamit sana. Dai dapat sinda malingaw kan tunay na kakanon, an kakanon na magdadara sainda sa buhay na daing kasagkoran.

Paghorop-horopan nyato an tataramon na hanap-buhay. Ano baga talaga an hinanap nyato sa hanap-buhay? Bakong buhay? Alagad, anong klaseng buhay? Nakakamundo an kamugtakan kan satong mga tugang na domestic helpers sa ibang nasyon. Sa Hong Kong, sa Singapore , sa Saudi asin dakul pang iba. Iniimbarguhan nin pasaporte. Kinukulong. Kinukulgan. Linulupigan. An saindang hanap-buhay nagdadara sainda sa kagadanan, kagadanan kan saindang dignidad, kan saindang pagkatawo.

An satong mga pulitiko na kun sain an pulitika iyo na an hanap-buhay nin bilog na pamilya. Pagnakanamit na nin kapangyarihan, habo nang butasan. Siring sa pagkurapot nin halas sa kahoy. Siring sa pagkakupo nin tuko sa lanob. Kun tapos na an saiyang termino, ipapasa sa saiyang agom. Herak man sa mga naghahalat man na iindorso. Ano talaga an hanap ninda sa pulitika? Anong klaseng buhay an iwinawaras ninda sa banwaan? Pagkatapos na masirot an kayamanan sa kaban kan gubyerno, ano an gigibuhon ninda sa saindang sinakong kwarta? Iyan an hanap-buhay na magdadara nin kagadanan sa saindang kalag. Iyan an salang hanap-buhay.

An tamang hanap-buhay dapat magtao sato nin maginhawang buhay, an buhay nin kabanalan, an buhay na magdadara sato sa ika-duwang buhay.

An dating Presidente, si Cory Aquino, nagtao nin halimbawa nin liderato na inspirado nin kabanalan. Susog sa kadakul na testimonyo, sya sarong mapamibing tawo. An kusog asin kapangyarihan dai nya kinua sa mga maating kwarta asin mga masumbikal na militar, kundi sa Mahal na Dyos. Sya nagadan, nagpapamibi para sa satong nasyon.

An peregrinasyon sarong gawe nin kristyano na nagpapagirumdom sa saiya na sya nag-aagi sana sa kinaban na ini. Bako ini an saiyang permanenteng istaran. An buhay nya sa kinaban pag-andam para sa mas mahiwas na kinaban.

An bulan na Septyembre, bulan nin peregrinasyon para sa mga taga Naga. Bako ining bulan nin kumersyo, kundi bulan nin paghorop-horop asin pagpamibi. Andamon nyato an satong lugar para sa mga bisita nyato tanganing sinda magkaigwa nin banal asin matuninong na ekspiryensya, tanganing sinda totoong magkaigwa nin religious experience sa satong lugar. Ini dakulang tabang nyato sainda tanganing siring sa sato, sinda man makapaghorop-horop dapit sa dalan pasiring sa tunay na buhay, an buhay na daing kasagkoran. Duman, an kakanon dai nagpapanos. Duman nag-eerok si Jesus, an tinapay nin buhay.

Duwang klase an hanap-buhay. Duman kita sa madara sato sa tunay na buhay, an buhay na daing kasagko