An Tamang Inaandaman

Yaon na naman kita sa bagong taon in liturhiya. Inaapod ining Taon A. An pinakaenot na Domingo kan Taon iyo an Enot na Domingo nin Adbyento.

An adbyento pag-andam sa Pasko. Sa kasaysayan kan satong kaligtasan, an Pasko o an pagpintakasi kan pagkamundag nin satong Kagurangnan saro sa pinakamahalaga. Sunod ini sa Paskwa o an pagsakit, pagkagadan asin pagkabuhay-liwat nin Kagurangnan. An pag-andam sa Paskwa iyo an kwaresma.

Malinaw na an mensahe kan adbyento iyo an pag-andam. Sa mga tawong nakakalingaw kan saindang pagka-Kristyano, an saindang pag-andam yaon sana sa kaibabawan, sa mga bagay na nakakapaogma sa paghiling, pagdangog, pagmate nin mga sentido. Asin sa pag-andam ninda, dakul an panahon sa mga malls, kisa sa simbahan. An mga malls inaapod na one-stop-shop. Makakasaod ka na, makakakakan ka pa, makakasine ka pa.

An mga babasahon ngunyan nagpupukaw sa sato sa satong pagkaturog. Pinapagirumdom kita kan satong pagka-Kristyano. An pinag-uurulayan na pag-andam mayo sa kaibabawan kundi yaon sa laog kan satong puso, kan satong boot.

Kan todos los santos, kaniguan an pirintahan kan mga pantyong. Alagad, ano an yaon sa laog kan pantyong? Bakong gayong mahalaga an dekorasyon, an bagong pintura, an mga nakapalibot na kandila. Mas mahalaga an kaligtasan kan kalag kan satong namumutan.

Si Papa Julius Segundo iyo an papa kan panahon na inaapod Renaissance. Sya inaapod na Papa Terribile, an kinakatakutan na Papa. Sa panahon nya, nabilog giraray an nagkabaranga nang Papal States. Sya mismo an namamayo sa gera. Sya an nagpagaba kan lumang simbahan asin an nagpatugdok kan bagong simbahan na iyo na an bagong St. Peter’s Basilica. Sya an nakamidbid kan tibay ni Michelangelo na iyo an nag-ukit kan Pieta kan 24 pa sana an edad. Sya kinua kan papa tanganing iyo an maggibong disenyo kan saiyang lulubngan sa bagong simbahan. Sya man an kinumisyon tanganing magpinta kan Kapilya Sistina. Kan ginigibuhan sya nin estatwa dapit saiya, hinapot sya ni Michelangelo: ano an ibubugtak ko sa saimong walang kamot? Libro?” An simbag kan papa: “Ano an pagkaaram ko sa letra? An ibugtak mo sarong espada!” Dakul na tawo asin klerigo an nangangapudan sa pagpanibago kan Simbahan. Alagad, an papa nagbungog-bungogan. Tanganing mapunduhan an manlaenlaen na proyekto, padagos an pagpabakal nin mga pwesto asin pusisyon sa simbahan, an pagpabakal nin mga indulhensya, patin an kaligtasan.

Sa panahon na idto, namumurak an lalawgon kan simbahan, alagad naglalapa an puso sa saiyang daghan. An repormang pangapudan, si Martin Luther an nangenotan sa pakilaban. An kastigo iyo an pagkamundag kan Protestanteng simbahan. Ini sarong dakulang leksyon para sa satong namomotan na Simbahan.

Lakaw kita pasiring sa bagong Jerusalem, sabi kan salmo responsorial. An Jerusalem na ini sarong one-stop-shop para sa satong puso asin kalag. Ini an ginigikanan kan tataramon nin Dyos. Digdi makukua ta an kadunongan asin kapatawaran nin Dyos. Makakapahingalo ka na, mapapatawad ka pa, makakanood ka pa. Ini an ladawan kan bagong Jerusalem na pinapahayag sa enot na binasa. Ini an satong simbahan; ini an satong parokya. Ini an satong dalaganán bilang mga disipulo kan satong Kagurangnan.

Dai pagtawan dakulang doon an satong buhay sa kaibabawan. Mahalaga man an mga dekorasyon. Mahalaga man an karakanan, an Christmas Party, an noche Buena. Alagad, an mga ini palatandaan sana kan kaogmahan kan satong puso. An satong dekorasyon dai dapat makipagkumpitensya sa mga tindahan, sa mga ristorante, sa mga malls. Dai dapat kita mabuta sa mga bagay na orog mahalaga: an satong kalag, an satong puso, an satong karahayan boot.