Daíng salà

SA HILÍNG KO, dikit-dikit nang narurugbâ an Libmanan-Cabusao Dam Project. Marurugba ini na dai man lamang nahiling kan mga tawo an pagtindog kaini. Kadakol nang mga nangyari, kadakol nang mga promesa, kadakol nang mga pinanaóng pautang. Mamomroblema na sa siringilan. Kadakol nang mga patubód na mangyayari, siring man na kadakol nang mga karibongan na dinara. Kadakol naman ining ginibong pagkabarangâ, asin man na kadakol na ining dinarang dai pagkasinarabotan. Sa katapusan, makusugon an pagtubod kong, siring sa itinutulod na adbokasiya, dai nanggad ini maitutugdok, siring sa samong dayaday na kamàwótan sa kapiripinònan kan pagkontra. An pagtubod kong ini sinusuportahan kan mga pahayag kan mga enot nang kagtulod kan dam na masakit na ining ipadagos.

Maogmang bareta. Alagad nakakarima-rimá.

An padagos nang pagkatunod kan LCDP sarong malinaw na daing kamanungdanan na pagwaldas kan kuwarta kan banwaan. Tandaan ta na kaidto, kanigoan na gayo kun sinda mag-alamusa nin kuwarta sa saindang mga pagtiripon, mga pa-seminar, mga tour arog kaidtong ginibo ninda sa Carcar. Tandaan man na sagkod ngunyan daing tultol na paghayag ini kan mga ginastusan siring sa pagtulod kan gabos sa transparency tanganing puhuon an korapsyon. An siste, siisay an puwede tang balikan sa kapalpakan na ini?

Igwa nin mga panahon kaidto na sinasabi kan media na anggot an mga taga-Libmanan sa mga taga-Lupi na minakontra sa dam. Puwedeng hilingon na an mga taga-Lupi an maysalà kun tano ta an dam dai na magsasagop nin tubig sa Malaguico, Sipocot. Alagad, para samô, malinaw na bako kami an may remalaso.