Daíng salà

Kun inadalan saná nindang marhay an proyekto, tibaad nagin mahalnas an paghiro asin paghaman kan LCDP. Kun tinultol asin dai wináso an mga pagsaliksik, tibaad nahiling tulos ninda an mga posibleng problema asin dai na nag-abot sa lebel nin kariribokan asin riribayan nin mahaharang na tataramon. Kun pinakarhay saná ninda asin ginibong totoo an pagkonsulta sa mga namamanwaan, dai na kuta na nabungangaan kan mga taga-Lupi asin Sipocot an mga taga-NIA asin BRBWMP. Kun isinapusò saná kuta ninda an pag-adal sa pangkapalibutan na aspekto kan dam, haloy na kuta nindang naaraman na dai nanggad maninigong tugdukan an dam site na saindang napili. (Sa pagsurat ko kaini, nagbaba na naman an daga sa riles kan PNR na harani sa dam site.) Kun dai ninda dinali-dalì an pag-implementar kan proyekto na garo baga igwa sindang linalamag na ano daw, na garo baga puwede nang daing pakimàno sa mga madadanyaran basta maitugdok saná an dam, kun dai sinda ninda ginibong karaskasan di dai kuta natunok an dam. Kun pakarhay saná kuta an saindang mga pag-iisip na pantay an pagmangno sa mga benipisyaryo asin mga madadanyaran, di dai kutang mga diringkilan na nangyari. Kun dai kutang mga nagbayad sa malisyosong radio advertisements, mayo kutang malisyang mahihiling sa kalakawan kan LCDP.

Ngunyan, siisay an babalikan ta kaini? Bakong kaban kan banwaan an nahiro?

An status kan proyekto poon pa kan Disyembre 2009, padagos ini sa pagiging indefinitely suspended, boot sabihon, magdadanay ini sa daing kasiguruhan. Sa pagiging daing kasiguruhan, daing mga tawong accountable an mananagot asin puwedeng makasuhan. Abang rahay-rahay na kamugtakan! Boot sabihon, sagkod sa panahon na ini, daing maysalà-tibaad, hinihiling pa man giraray na daíng salâ-dawa an LCDP nagpapahiling nin makuring kasalauláan asin kaputikan sa lado kan mga nagturulod kaini. Kun sa Japan ini, nag-resign na kuta sinda, o kun dai...

Igwa ini nin mga tawong accountable. Sa likod kan kantidad na duwang bilyon, magabat man an pangapudan kan banwaan na hanapon an may kasàlán. Dai man puwedeng mayo. Imposible man na sa kadaradakulang kapalpakan asin kapalpalan na ini, mayong tawong dapat sulsulon. Ta kun mayo, puwede ta nang sabihon an sinasabi kan burat-"Ano ngaran man na...?"

Hilingon ta. Hilingon ta.

Nagba-blog si Vic Nierva sa http://aponihandiong.blogspot.com asin minasuporta sa http://lupikontradam.blogspot.com.