Haliya

UYA AN RAWITDAWIT na binasa sa 'Haliya nin Banwaan: Protesta sa Pagratak kan National Artist Awards':

Haliya! Haliya sa itaas!

Haliya! Haliya sa too!

Haliya! Haliya sa wala!

Haliya! Haliya sa ibaba!

Madiklom! Madiklom!

Hilnga an kalangitan, abo an panganoron.

Totoo nanggad an bulan hinalon,

Tampalasan na Bakunawa satong purisawon!

Amakan an baga, ibudbod an arawa,

Hare baya, mga katood, si Bakunawa pahangusa.

Tangani na an bulan ibalik niya sa langit

Asin maginhawahan kita, mahawas sa ngitngit!

Haliya! Haliya sa itaas!

Haliya! Haliya sa too!

Haliya! Haliya sa wala!

Haliya! Haliya sa ibaba!

 

Ay! Ta Bakunawa, daog ka nang totoo,

Bago pa man kami gabos nanitawo.

Sa saimong taguan lumuwas, magpahiling,

Atubangon kaming mga inaling ni Iling.

 

Ipakol an sogkod sa kalayong pamibian.

Ipakol an sogkod sa dagang namomotan.

Ipakol an sogkod sa doros tang hinahangos.

Ipakol  an sogkod sa tubig na dayaday na minabulos.

Haliya! Haliya sa itaas!

Haliya! Haliya sa too!

Haliya! Haliya sa wala!

Haliya! Haliya sa ibaba!

 

Bakunawa, ibalik an bulan, ibalik an tingraw,

Ibalik an bini kan Musang saimong pinurisaw.

Mahihiling kan gabos an saimong kaluyahan

Masisirangan kan kinaban simong pagkatampalasan.

 

Ngunyan na banggi, an saimong pagtapos,

Huli ta an paghabas mo dai mi nanggad itotogot.

Aagawon mi an bulan, aagawon mi an bulan,

Bubuhayon mi an kinaban nin kaliwanagan.

Haliya! Haliya sa itaas!

Haliya! Haliya sa too!

Haliya! Haliya sa wala!

Haliya! Haliya sa ibaba!

 

An saimong payo sa sogkod mi maroronot.

Kaiba kan balakid mong mga pagmawot.

Popotolon mi an saimong ikog

Tanganing dai ka na makapangulog.

 

Iluwa mo an bulan ming mahal,

Patalingkason mo an Musa ming mahal;

Sa kagayonan dai ka angay magrimpos

Huli tai ka enot nang makanos!

Haliya! Haliya sa itaas!

Haliya! Haliya sa too!

Haliya! Haliya sa wala!

Haliya! Haliya sa ibaba!

 

An biko-biko ming salog

Saimo daing duwa-duwang maanod;

Lalamoson ka kan mga makuapo ni Handyong,

Gagadanon ka kan mga aki kan Ibalon.

 

Ay! Bakunawa, akoa an saimong kadaogan,

Huli ta ika samong babantayan.

Dai mo nanggad mararatakan

Ining abang Musang labing kabinian.

Haliya! Haliya sa itaas!

Haliya! Haliya sa too!

Haliya! Haliya sa wala!

Haliya! Haliya sa ibaba!

 

Uya na! Uya na an bulan na halat!

Uya na! Uya na an Musang padangat!

Matingraw, makolor an saiyang palibot

Tanda nin pagtalingkas na samong minamawot!

 

Ay, mga katood, satong ipintakasi

Ining maugayon asin magayon na banggi.

An bulan liwat sa langit, an Musa ibinalik,

Dai nanggad itogot na liwat pang masaklit.

Haliya! Haliya sa itaas!

Haliya! Haliya sa too!

Haliya! Haliya sa wala!

Haliya! Haliya sa ibaba!