Sinasabat an mga aldaw sa syudad, kan mga nagtiripon-tipon
na mga langaw sa mga ati na nagpakuriyat sa mga kripot na tinampo.
Nagbarasay-basay sindang mga langaw sa nasulong merkado-
Nag-oorolay kan mga bagong kalansay na nakutkot
sa natad kan simbahan; kun siisay an bagong sambay
kan mga dayong paratinda sa Plaza ni Rizal;
kun nabisto na si hawak na daing tabay na nag-aanod-anod
sa salog na iyong pinakadakulang kali, karigosan kan gabos na ati-
Mantang nagkakape-kape an pamusong alkalde asin nagbabasa
kan saiyang paboritong dyaryong parati niyang may pandok,
na kan minsan tugpaan nin dakulang langaw, nabaldi siya
asin nirapado niya ini, hiningowang tigbakon an pesteng dayo.
Alagad nakabuhi an marigmat na insekto, kaya pigbukod ini
kan pamayo paluwas sa saiyang harong sagkod na makaabot
sinda sa istasyon kan radyo, kun sain an langaw nagtugdon
sa mikropono asin nagpuon na maghangaw, magtuyaw,
magbutog, magpabaw-abaw, kan mga kadunongan
sigun sa isip kan mga langaw.
May diit na supog na namatian an pamayo kan syudad
ta dai siya nakabulos nin tanos, dai siya nakaandam
kan saiyang itataram na platika. Napanlingaw naman siya
kan saiyang kaangotan sa langaw na nakakua na kan saiyang
teritoryo. Naogma an alkalde kan nagpuon siyang kumustahon,
kan langaw na nakatugdon sa mikropono, hinapot siya kaini
kan saiyang pigkaabahalan, kan plano niya sa sunod na eleksyon,
kan pagkaminootan ninda kan saiyang saro-sarong agom.
Asin sa huri, inomaw-omaw na kan langaw an alkalde
kun gurano kaini pinaogma an mga langaw sa syudad
ta pinabuksan kaini an mga nitso, pinailawan an dalan
nin mahahamis na kolor mantang sa irarom yaon an lam'awan
kun sain nagsasayaw-sayaw an binuburat na syudad.
Nagtaong suhestyon an dakulang langaw kun pano maggibo
nin bukid na basura, istaran para sa mga pobreng langaw.
Asin uminuyon man an pamayo, na nagsabi, na haloy niya
na ining plano, ta nasa puso niya an gabos na langaw sa kinaban.
Haros magkahiribi na an duwa sa saindang pigtararam.
Orog na ta igwa pang mga nag-arapod sa istasyon, patotoo-
kan karahayan asin mga naginibohan kan pamayo.
Sa kinatapusan kan orolay, nagluluwas na gari haloy
nang magkatuod an alkalde buda an langaw, gari magpadi.
Pagkatapos kan programa, sabay sindang nagluwas sa istasyon,
Inagyat kan pamayo na magduman muna sa harong niya
an langaw na tinagamahan niya nin managom na kape.
Dai nakahabo an insekto ta siisay man an makakasayuma sa alkade.
Burulakog, nakaturuhok an dakulang mata kan langaw
sa pamayong nakatukaw sa trono. Orog na pigbahog-bahog
pa an langaw nin dakul na usipon kan nangyayari sa balyong partido,
kan mga tuyaw niya sa saiyang mga parabalubaging kritiko.
Sa buot kan langaw, naghahangaw naman an alkalde
ta yaon na ini sa saiyang teritoryo. Pigdangog ini
gabos kan matinios na langaw, mantang pigmamakis-makis
kun arin an saiyang panghingagdanon na kakanon, kun ano
an enot niyang riripahan, sain enot na matugdon-
sa nagluluwas na tubol na udo o sa bilog na lawas
kan pamayo na namamarong-mas mabata pa sa Balatas.